រដ្ឋសភាកម្ពុជា​ នឹងបន្តសម្របសម្រួលពង្រឹងកិច្ចសហប្រតិបត្តិការក្នុងស្មារតីនៃវិបុលភាព និងការប្រើប្រាស់ទឹកប្រកបដោយចីរភាព__ ឯកឧត្តមកិត្តិសេដ្ឋាបណ្ឌិត ជាម យៀប អញ្ជើញជាអធិបតីភាពបើកសិក្ខាសាលា​ ស្តីពីចក្ខុវិស័យទឹក៖​ ទស្សនវិស័យពីកម្ពុជា__ សេចក្តីជូនដំណឹង​ អគ្គលេខាធិការដ្ឋានរដ្ឋសភា__ សេចក្តីប្រកាសព័ត៌មាន ស្តីពីលទ្ធផលនៃកិច្ចប្រជុំគណៈកម្មាធិការអចិន្ត្រៃយ៍រដ្ឋសភា នាព្រឹកថ្ងៃព្រហស្បតិ៍ ទី១៨ ខែមេសា ឆ្នាំ២០២៤ ៕ សម្តេចរដ្ឋសភាធិការធិបតី ឃួន សុដារី ដឹកនាំគណៈប្រតិភូរដ្ឋសភាកម្ពុជា ចូលរួមពិធីបើកកិច្ចប្រជុំកំពូលប្រធានសភាជាស្រ្តីពិភពលោកជាផ្លូវការនៅវិមានរដ្ឋសភាបារាំង__ តំណាងរាស្រ្តនៃប្រទេសទាំងពីរគាំទ្រក្នុងការជំរុញទំនាក់ទំនងរវាងប្រជាជននិងប្រជាជនពិតជាសំខាន់ណាស់ ៕

ទំព័រមុខ » គណៈកម្មការទី២ » សកម្មភាព » គណ:កម្មការរដ្ឋសភា ជួបប្រជុំជាមួយតំណាងរាជរដ្ឋាភិបាល ដើម្បី ពិនិត្យពិភាក្សាលើសេចក្តីព្រាងច្បាប់ចំនួន៥
គណ:កម្មការរដ្ឋសភា ជួបប្រជុំជាមួយតំណាងរាជរដ្ឋាភិបាល ដើម្បី ពិនិត្យពិភាក្សាលើសេចក្តីព្រាងច្បាប់ចំនួន៥
រៀបរៀងដោយ ៖​ NARA1472 ​ នៅថ្ងៃទី (1/21/2024 11:56:42 PM )

គណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម នៃរដ្ឋសភា ដឹកនាំដោយ ឯកឧត្តម ឈាង វុន ប្រធានគណៈកម្មការ សហការ ជាមួយគណៈកម្មការ សាធារណការ ដឹកជញ្ជូន ទូរគមនាគមន៍ ប្រៃសណីយ៍ ឧស្សាហកម្ម រ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់ នៃរដ្ឋសភា ដឹកនាំដោយ លោកជំទាវ និន សាផុន ប្រធានគណៈកម្មការ បានជួបប្រជុំជាមួយតំណាង រាជរដ្ឋាភិបាលដែលដឹកនាំដោយ ឯកឧត្តម ស៊ុយ សែម រដ្ឋមន្ត្រីក្រសួងរ៉ែ និងថាមពល និងឯកឧត្តមបណ្ឌិតសភាចារ្យ ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ ដើម្បីពិនិត្យពិភាក្សាលើសេចក្តីព្រាងច្បាប់ចំនួន៥ នារសៀលថ្ងៃទី២០ ខែមិថុនា ឆ្នាំ២០២៣ នៅវិមានរដ្ឋសភា។ កិច្ចប្រជុំនេះក៏មានការអញ្ជើញចូលរួមពីសំណាក់ឯកឧត្តម លោកជំទាវ ជាសមាជិក សមាជិកា គណៈកម្មការជំនាញ នានារបស់រដ្ឋសភាផងដែរ។

សេចក្តីព្រាងច្បាប់ចំនួន៥ដែលត្រូវពិនិត្យ និងពិភាក្សានៅពេលនេះរួមមាន៖

១-សេចក្តីព្រាងច្បាប់ស្ដីពី ការអនុម័តយល់ព្រមលើការធានាទូទាត់របស់រាជរដ្ឋាភិបាល នៃព្រះរាជាណាចក្រកម្ពុជា ឱ្យក្រុមហ៊ុន ខ្មែរ អេឡិកទ្រីខល ផៅវ័រ សម្រាប់គម្រោងអភិវឌ្ឍន៍វារីអគ្គិសនីស្ទឹងឫស្សីជ្រុំកណ្តាល អានុភាព ៧០មេហ្កាវ៉ាត់ ផ្គួបគ្នាជាមួយ គម្រោងអភិវឌ្ឍន៍ វារីអគ្គិសនីស្ទឹងវាលថ្មកំបុត អានុភាព ១០០មេហ្កាវ៉ាត់ ខេត្តកោះកុង។

២-សេចក្តីព្រាងច្បាប់ស្ដីពី ការអនុម័តយល់ព្រមលើការធានាទូទាត់របស់រាជរដ្ឋាភិបាល នៃព្រះរាជាណាចក្រកម្ពុជា ឱ្យក្រុមហ៊ុន ឡាក់ឃី សូឡា ផៅវ័រ ឯ.ក សម្រាប់គម្រោងអភិវឌ្ឍន៍ស្ថានីយផលិតអគ្គិសនី ដើរដោយថាមពលពន្លឺព្រះអាទិត្យ អានុភាព ៨០មេហ្កាវ៉ាត់ ខេត្ត ព្រៃវែង។

៣-សេចក្តីព្រាងច្បាប់ស្តីពី ការអនុម័តយល់ព្រមលើការធានាទូទាត់របស់រាជរដ្ឋាភិបាលនៃព្រះរាជាណាចក្រកម្ពុជា ឱ្យក្រុមហ៊ុន ស្នេថេក ខូអិលធីឌី សម្រាប់គម្រោងអភិវឌ្ឍន៍ស្ថានីយផលិតអគ្គិសនីដើរដោយថាមពលពន្លឺព្រះអាទិត្យ អានុភាព ១៥០មេហ្កាវ៉ាត់ ខេត្តពោធិ៍សាត់។

៤-សេចក្តីព្រាងច្បាប់ស្តីពី ការអនុម័តយល់ព្រមលើការធានាទូទាត់របស់រាជរដ្ឋាភិបាលនៃព្រះរាជាណាចក្រកម្ពុជា ឱ្យក្រុមហ៊ុន ស្នេថេក ខូអិលធីឌី សម្រាប់គម្រោងអភិវឌ្ឍន៍ស្ថានីយផលិតអគ្គិសនីដើរដោយថាមពលពន្លឺព្រះអាទិត្យ អានុភាព ៦០មេហ្កាវ៉ាត់ ខេត្តស្វាយរៀង។

៥-សេចក្តីព្រាងច្បាប់ស្តីពី ការអនុម័តយល់ព្រមលើការធានាទូទាត់របស់រាជរដ្ឋាភិបាលនៃព្រះរាជាណាចក្រកម្ពុជា ឱ្យក្រុមហ៊ុន ស្នេថេក ខូអិលធីឌី សម្រាប់គម្រោងអភិវឌ្ឍន៍ស្ថានីយផលិតអគ្គិសនីដើរដោយថាមពលពន្លឺព្រះអាទិត្យ អានុភាព ៦០មេហ្កាវ៉ាត់ ខេត្តកំពង់ឆ្នាំង។

ឯកឧត្តម ស៊ុយ សែម រដ្ឋមន្ត្រីក្រសួងរ៉ែ និងថាមពល បានមានប្រសាសន៍ថា សេចក្តីព្រាងច្បាប់ទាំង៥ខាងលើ រៀបចំឡើងដើម្បីបំពេញ អោយបានតាមតម្រូវការប្រើប្រាស់អគ្គិសនី ក្នុងស្មារតីប្រុងប្រយ័ត្នខ្ពស់ ដែលអាចធានាបានថា ការអភិវឌ្ឍវិស័យថាមពលស្ថិតក្នុងកម្រិត សមស្រប ដោយរាជរដ្ឋាភិបាលបានអនុញ្ញាតអោយក្រុមហ៊ុនទីប្រឹក្សាមកពីប្រទេសជប៉ុន សហការជាមួយគណៈកម្មការអន្តរក្រសួង ដែល ដឹកនាំដោយក្រសួងរ៉ែ និងថាមពល ធ្វើការសិក្សានឹងរៀបចំផែនការមេក្នុងការអភិវឌ្ឍវិស័យថាមពល សម្រាប់ឆ្នាំ២០២០ ដល់ឆ្នាំ២០៣០ និងសម្រាប់រយៈពេលវែងពីឆ្នាំ២០២០ ដល់ឆ្នាំ២០៤០។

ឯកឧត្តម ស៊ុយ សែម រដ្ឋមន្ត្រី បានមានប្រសាសន៍បន្តថា តាមការវិភាគ និងការព្យាករណ៍របស់អ្នកជំនាញប្រសិនបើពុំមានអ្វីប្រែប្រួលទេ កំណើននៃសេចក្តីត្រូវការអគ្គិសនី និងបន្តកើនឡើងខ្ពស់ក្នុងរយៈពេលប៉ុន្មានឆ្នាំខាងមុខ។

សេចក្តីព្រាងច្បាប់ទាំង៥ខាងលើ ត្រូវបានសម័យប្រជុំពេញអង្គគណៈរដ្ឋមន្រ្តីកាលពីថ្ងៃទី៧ ខែមេសា ឆ្នាំ២០២៣ បានសម្រេចឯកភាព ទាំងស្រុងលើគម្រោងអភិវឌ្ឍន៍អគ្គិសនីទាំង៥ គម្រោងខាងលើនឹងបញ្ជូនមកស្នើសុំការអនុម័តពីរដ្ឋសភា។

បន្ទាប់ពីតំណាងរាជរដ្ឋាភិបាល បានធ្វើការពន្យល់បកស្រាយ និងជម្រាបជូនពីអត្ថប្រយោជន៍ នៃសេចក្ដីព្រាងច្បាប់នីមួយៗ នៅក្នុងការ ជំរុញការអភិវឌ្ឍសេដ្ឋកិច្ចសង្គម ដែលមានការពាក់ព័ន្ធនឹងវិស័យអគ្គិសនីរួចមក គណៈកម្មការរដ្ឋសភា បានថ្លែងកោតសរសើរចំពោះ រាជរដ្ឋាភិបាល ក៏ដូចជាក្រសួងស្ថាប័នពាក់ព័ន្ធ ដែលបានខិតខំយកចិត្តទុកដាក់រកគ្រប់មធ្យោបាយក្នុងការអភិវឌ្ឍវិស័យអគ្គិសនី សម្រាប់ បម្រើតម្រូវការចាំបាច់របស់ប្រជាពលរដ្ឋ និងប្រទេសជាតិ។ នៅក្នុងកិច្ចប្រជុំនេះ គណៈកម្មការរដ្ឋសភា បានសម្ដែងការគាំទ្រទៅលើ សេចក្ដីព្រាងច្បាប់នេះទាំងស្រុង ដោយពុំមានការកែប្រែអ្វីឡើយ  ដោយគណៈកម្មការបានឯកភាពគ្នា ធ្វើសេចក្តីរាយការណ៍ជូនគណៈ- កម្មាធិការអចិន្ត្រៃយ៍រដ្ឋសភា ដើម្បីសម្រេចដាក់បញ្ចូលសេចក្ដីព្រាងច្បាប់ទាំង៥ ទៅក្នុងរបៀបវារៈសម័យប្រជុំរដ្ឋសភា ធ្វើការអនុម័ត នាពេលខាងមុខ ៕

អត្ថបទ និងរូបភាព ដោយនាយកដ្ឋានព័ត៌មាន