ទំព័រមុខ » ព័ត៌មាន » ព័ត៌មានប្រចាំថ្ងៃ » សភាកម្ពុជាប្រជុំរៀបចំការងារត្រៀមលក្ខណៈសម្រាប់ការធ្វើជាម្ចាស់ផ្ទះរៀបចំមហាសន្និបាតអាយប៉ា លើកទី៤៣ ក្នុងឆ្នាំ២០២២
សភាកម្ពុជាប្រជុំរៀបចំការងារត្រៀមលក្ខណៈសម្រាប់ការធ្វើជាម្ចាស់ផ្ទះរៀបចំមហាសន្និបាតអាយប៉ា លើកទី៤៣ ក្នុងឆ្នាំ២០២២
រៀបរៀងដោយ ៖​ NA1472 ​ នៅថ្ងៃទី (11/24/2021 12:59:31 AM )

ឯកឧត្តមកិត្តិសេដ្ឋាបណ្ឌិត ជាម យៀប ប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម នៃរដ្ឋសភា និងជាប្រធានក្រុម រដ្ឋសភាជាតិអាយប៉ា-កម្ពុជា នៅព្រឹកថ្ងៃទី២៤ ខែវិច្ឆិកា ឆ្នាំ២០២១ បានដឹកនាំកិច្ចប្រជុំរៀបចំការងារត្រៀមលក្ខណៈសម្រាប់ការរៀបចំ មហាសន្និបាតអាយប៉ាលើកទី៤៣ ដែលសភាកម្ពុជានឹងធ្វើជាម្ចាស់ផ្ទះរៀបចំនៅឆ្នាំ២០២២ខាងមុខ។

កិច្ចប្រជុំនេះបានរៀបចំឡើងនៅសាលសន្និសីទបាយ័ន នៃវិមានរដ្ឋសភា ដោយមានការចូលរួមពី ឯកឧត្តម ឡេង ប៉េងឡុង អគ្គលេខាធិ- ការរដ្ឋសភា ឯកឧត្តមអគ្គលេខាធិការរង ឯកឧត្តម លោក លោកស្រី និងមន្ត្រីជំនាញអាយប៉ាមួយចំនួនទៀត។

ថ្លែងក្នុងកិច្ចប្រជុំ ឯកឧត្តមកិត្តិសេដ្ឋាបណ្ឌិត ជាម យៀប បានមានប្រសាសន៍ថា សភាកម្ពុជា បន្ទាប់ពីទទួលញញួរពីមហាសន្និបាត អាយប៉ា លើកទី៤២ តាមប្រព័ន្ធនិម្មិត នៅប្រទេសព្រុយណេកន្លងមក ទើបតែពេលនេះទេ បានរៀបចំកិច្ចប្រជុំរៀបចំការងារត្រៀម លក្ខណៈសម្រាប់ការរៀបចំកិច្ចប្រជុំអាយប៉ា លើកទី៤៣ និងពិនិត្យឡើងវិញនូវការងារមួយចំនួន ពាក់ព័ន្ធនឹងមហាសន្និបាតអាយប៉ា លើកទី៤៣។

ឯកឧត្តម កិត្តិសេដ្ឋាបណ្ឌិត បានស្នើឲ្យអគ្គលេខាធិការដ្ឋានរដ្ឋសភា ធ្វើការពិនិត្យមើលការងារឡើងវិញ ដើម្បីរៀបចំមហាសន្និបាត អាយប៉ាលើកទី៤៣ អោយទទួលបានជោគជ័យដូចកិច្ចប្រជុំនានា ដែលសភាកម្ពុជាធ្លាប់បានធ្វើជាម្ចាស់ផ្ទះកាលពីពេលកន្លងមក។

បន្ទាប់ពីឯកឧត្តម លោក លោកស្រី ជាសមាជិក សមាជិកា នៃអង្គប្រជុំបានចូលរួមផ្ដល់យោបល់ និងលើកឡើង នូវមតិពិភាក្សារួចមក ឯកឧត្តមកិត្តិសេដ្ឋាបណ្ឌិត ជាម យៀប បានថ្លែងអំណរគុណយ៉ាងជ្រាលជ្រៅដល់អង្គប្រជុំ ចំពោះមតិល្អៗដែលបានលើកឡើងនាពេល នេះ។ ឯកឧត្តមកិត្តិសេដ្ឋាបណ្ឌិត បានផ្តាំផ្ញើឲ្យអនុគណៈកម្មការរៀបចំនីមួយៗ បន្តធ្វើការងារតាមមុខសញ្ញារៀងៗខ្លួន សំដៅធ្វើយ៉ាង- ណាត្រៀមលក្ខណៈអោយបានគ្រប់ជ្រុងជ្រោយ ដើម្បីធានាអោយកិច្ចប្រជុំមហាសន្និបាតអាយប៉ាលើកទី៤៣ នៅក្នុងឆ្នាំ២០២២ ខាងមុខ ប្រព្រឹត្តទៅដោយរលូន និងទទួលបានជោគជ័យ ៕

អត្ថបទ និងរូបភាព ដោយនាយកដ្ឋានព័ត៌មាន