ឯកឧត្តម ឈិត គឹមយាត អនុប្រធានគណៈកម្មការកិច្ចការបរទេស សហប្រតិបត្តិការ ឃោសនាការ និងព័ត៌មាន នៃព្រឹទ្ធសភា និង ឯកឧត្តម ព្រហ្ម វិរៈ អគ្គនាយកទំនាក់ទំនងអន្តរជាតិ ពិធីការ និងព័ត៌មាន នៃអគ្គលេខាធិការដ្ឋានរដ្ឋសភា បានអញ្ជើញចូលរួមក្នុង កិច្ចប្រជុំអន្តរក្រសួង ដើម្បីស្តាប់ការធ្វើបទបង្ហាញតាមរយៈអនឡាញ នៅរសៀលថ្ងៃទី២៩ ខែកញ្ញា ឆ្នាំ២០២១ របស់ក្រសួងការបរទេស និងសហប្រតិបត្តិការអន្តរជាតិ ជាមួយអង្គទូតនានា ស្តីពីការរៀបចំកិច្ចប្រជុំកំពូលអាស៊ី-អឺរ៉ុប លើកទី១៣ ដែលនឹងប្រព្រឹត្តទៅនៅថ្ងៃទី ២៥-២៦ ខែវិច្ឆិកា ឆ្នាំ២០២១ ខាងមុខ តាមប្រព័ន្ធវីដេអូ និងនីតិវិធីក្នុងការចូលរួមកិច្ចប្រជុំ ASEM13ក៏ដូចជាកិច្ចប្រជុំភាពជាដៃគូសភា អាស៊ី-អឺរ៉ុប លើកទី១១ (ASEP-11) ដែលសភានៃព្រះរាជាណាចក្រកម្ពុជាធ្វើជាម្ចាស់ផ្ទះ រៀបចំនៅថ្ងៃទី១៦ ខែវិច្ឆិកា ឆ្នាំ២០២១ខាងមុខ តាមរយៈអនឡាញ ឬហៅថាប្រព័ន្ធនិម្មិត (Virtual Meeting) ផងដែរ។
កិច្ចប្រជុំអន្តរក្រសួងតាមរយៈអនឡាញនាពេលនេះ ដឹកនាំដោយ ឯកឧត្តម លុយ ដាវីត រដ្ឋលេខាធិការក្រសួងការបរទេស និងសហ- ប្រតិបត្តិការអន្តរជាតិ ជាអនុប្រធានប្រចាំការ និងជាប្រធានលេខាធិការដ្ឋានរៀបចំកិច្ចប្រជុំកំពូលអាស៊ី-អឺរ៉ុបលើកទី១៣ (ASEM13)ដោយមានការចូលរួមពីអង្គទូតនានាដែលជាដៃគូ ASEM និង ASEP ព្រមទាំងភាគីពាក់ព័ន្ធមួយចំនួនទៀត។
ក្នុងបទបង្ហាញ បានលើកឡើងពីពេលវេលា នៃកម្មវិធីបើកកិច្ចប្រជុំ និងដំណើរការកិច្ចប្រជុំពាក់ព័ន្ធនានា ព្រមទាំងរបៀបរបបនៃការចុះ- ឈ្មោះរបស់បណ្តាអ្នកសារព័ត៌មានតាមបណ្តាប្រទេសនានា នៅក្នុងពិភពលោកដែលចង់ចុះឈ្មោះតាមរយៈអនឡាញ ដើម្បីចូលរួមយក ព័ត៌មាននៅក្នុងកិច្ចប្រជុំប្រជុំពាក់ព័ន្ធ នាពេលខាងមុខផងដែរ។
សូមជម្រាបជូនថា កិច្ចប្រជុំភាពជាដៃគូសភាអាស៊ី-អឺរ៉ុប Asia-Europe Parliamentary Partnership Meeting ហៅកាត់ថា ASEP គឺជា ព្រឹត្តិការណ៍ដាច់ដោយឡែកមួយរបស់កិច្ចប្រជុំកំពូលអាស៊ី-អឺរ៉ុប Asia-Europe Meeting ហៅកាត់ថា ASEM ដែលសភានៃព្រះរាជាណា- ចក្រកម្ពុជា នឹងធ្វើជាម្ចាស់ផ្ទះនៃកិច្ចប្រជុំភាពជាដៃគូសភាអាស៊ី-អឺរ៉ុប លើកទី១១ (ASEP-11) តាមរយៈអនឡាញ (Online) ឬហៅថាប្រព័ន្ធ និម្មិត (Virtual Meeting) ផ្សាយចេញពីរាជធានីភ្នំពេញ នៅថ្ងៃទី១៦ ខែវិច្ឆិកា ឆ្នាំ២០២១ ខាងមុខនេះ ក្រោមមូលបទ “ការពង្រឹងភាពជា ដៃគូសភា ដើម្បីសន្តិភាព និងការអភិវឌ្ឍដោយចីរភាព ក្នុងសម័យនិងក្រោយវិបត្តិកូវីដ១៩”។
កិច្ចប្រជុំភាពជាដៃគូសភាអាស៊ី-អឺរ៉ុប បានកោះប្រជុំលើកដំបូង នៅទីក្រុង Strasbourg ប្រទេសបារាំង ហើយបច្ចុប្បន្ន មានសមាជិក នៅក្នុងតំបន់អាស៊ី និងអឺរ៉ុប ចំនួន៥១ប្រទេស រួមទាំងអង្គការជាដៃគូពីរគឺ សហភាពអឺរ៉ុប និងលេខាធិការដ្ឋានអាស៊ាន។ សភានៃព្រះរាជា- ណាចក្រកម្ពុជា បានចូលរួមជាសមាជិក នៃកិច្ចប្រជុំភាពជាដៃគូសភាអាស៊ី-អឺរ៉ុប ក្នុងឆ្នាំ២០០៤ នៅទីក្រុងវ៉េ ប្រទេសវៀតណាម ៕
អត្ថបទ និងរូបភាព ដោយនាយកដ្ឋានព័ត៌មាន