លោកជំទាវ ឡោក ខេង ប្រធានគណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្ដុះបណ្ដាលវិជ្ជាជីវៈ និងកិច្ចការនារីនៃរដ្ឋសភា នៅព្រឹកថ្ងៃទី៥ ខែមេសា ឆ្នាំ២០២១ បានអញ្ជើញចូលរួមសិក្ខាសាលាស្តីពី "ផលប៉ះពាល់ នៃរោគរាតត្បាត កូវីដ១៩ លើសមភាពយេនឌ័រ" តាមប្រព័ន្ធវីដេអូ ដែលរៀបចំដោយអង្គការ APDA , Japan Trust Funds និងអង្គការUNFPA។
សិក្ខាសាលានេះ មានការចូលរួមពីសមាជិក សមាជិការបស់វេទិកា AFPPD សមាជិកសភាក្នុងតំបន់អាស៊ី-ប៉ាស៊ីហ្វិក និងអាស៊ីកណ្តាល ព្រមទាំងអង្គការ UNFPA, Plan International, JOICFP, IPPF។
លោកជំទាវ ឡោក ខេង បានមានប្រសាសន៍ឲ្យដឹងថា វាគ្មិនដែលបានចូលរួមក្នុងអង្គសិក្ខាសាលាបានយល់ស្របគ្នាថា ការរាតត្បាត នៃមេរោគកូវីដ១៩ បានធ្វើឲ្យមានផលប៉ះពាល់ធ្ងន់ធ្ងរលើបញ្ហាសុខភាព សេដ្ឋកិច្ច និងសង្គម។ មានបញ្ហាជាច្រើនដែលបណ្ដាលមកពី ការរាតត្បាតនៃកូវីដ១៩ គឺបានធ្វើអោយប្រទេសកំពុងអភិវឌ្ឍន៍មួយចំនួនដើរថយក្រោយ ក្នុងការធ្វើអោយសម្រេចបាននូវ SDGs។
សិក្ខាសាលាក៏បានធ្វើការកត់សម្គាល់ពីផលប៉ះពាល់លើស្ត្រី និងក្មេងស្រី ដែលខុសគ្នាពីបុរស ទាំងសុខភាព និងសេដ្ឋកិច្ច ជាពិសេសស្ត្រី ភាគច្រើនបានបាត់បង់ការងារធ្វើ រួមទាំងការងារក្រៅប្រព័ន្ធ និងមានការកើនឡើងនូវការទទួលខុសត្រូវនៅក្នុងគ្រួសារ ព្រមទាំងរងនូវអំពេី ហឹង្សាក្នុងគ្រួសារច្រើនជាងមុនទៀតផង។ លោកជំទាវបានបន្ថែមថា មានស្ត្រីសរុបប្រហែល៧០% បម្រើការងារក្នុងវិស័យសុខាភិបាល និងការងារសង្គមនៅក្នុងមូលដ្ឋាន ដែលមានហានិភ័យខ្ពស់ក្នុងការប្រឈមនៃការឆ្លងជំងឺកូវីដ១៩ជាងបុរស។
លោកជំទាវ ឡោក ខេង បានមានប្រសាសន៍ទៀតថា អង្គសិក្ខាសាលាបានធ្វើការផ្លាស់ប្តូរបទពិសោធន៍ពីបញ្ហាប្រឈមរបស់ស្ត្រីទៅវិញ ទៅមក និងបានរៀនសូត្រពីបញ្ហាប្រឈម ដោយពង្រឹងភាពជាដៃគូ ជាមួយភាគីពាក់ព័ន្ធ ដើម្បីជំរុញការត្រួតពិនិត្យឡើងវិញនូវគោល- នយោបាយ ច្បាប់ ក្នុងការឆ្លើយតបប្រកបដោយប្រសិទ្ធិភាព និងការបង្កើតនូវការពិគ្រោះយោបល់លើបញ្ហាសុខភាពផ្លូវចិត្ត ដោយមិន គិតថ្លៃ ដើម្បីលើកកម្ពស់សុខភាព ផ្លូវចិត្ត សុខភាពផ្លូវកាយ និងសុខភាពបន្តពូជជាដើម។
អង្គសិក្ខាសាលាក៏បានលើកឡើងពីការសម្របខ្លួនទៅតាមស្ថានភាពបច្ចុប្បន្ន ទាំងការធ្វើការ និងការរស់នៅតាមគន្លងថ្មី ដោយត្រូវខិតខំ ពង្រឹងនូវការបណ្តុះបណ្តាល ការអប់រំតាមប្រព័ន្ធអនឡាញដល់ស្ត្រី ឲ្យទទួលបានការអប់រំកាន់តែខ្ពស់ ដើម្បីអោយស្ត្រីទទួលបាននូវ ព័ត៌មានកាន់តែទូលំទូលាយ និងមានសមត្ថភាព ក្នុងការទទួលខុសត្រូវលើសេដ្ឋកិច្ចកាន់តែរឹងមាំ ព្រោះស្ត្រីត្រូវការមានសេដ្ឋកិច្ចដោយ ខ្លួនឯង ដើម្បីកាត់បន្ថយគម្លាតយេនឌ័រ និងកាត់បន្ថយនូវអំពើរំលោភបំពាននានា រួមទាំងអំពើហឹង្សាក្នុងគ្រួសារផងដែរ ៕
អត្ថបទ និងរូបភាព ដោយនាយកដ្ឋានព័ត៌មាន