សភាកម្ពុជា ពិសេសលេខាធិការដ្ឋានជាតិ ASEP11 នៅតែបន្តការងារត្រៀមលក្ខណៈសម្បត្តិសម្រាប់ការរៀបចំកិច្ចប្រជុំភាពជាដៃគូសភា អាស៊ី-អឺរ៉ុប លើកទី១១ ដែលសភាកម្ពុជានឹងត្រូវធ្វើជាម្ចាស់ផ្ទះនៅក្នុងឆ្នាំ២០២១នេះ ក្នុងរាជធានីភ្នំពេញ នៃព្រះរាជាណាចក្រកម្ពុជា។

នៅក្នុងកិច្ចប្រជុំត្រួតពិនិត្យលទ្ធផលការងារ ដែលបានអនុវត្តនាពេលកន្លងមក នាព្រឹកថ្ងៃទី១៤ ខែមករា ឆ្នាំ២០២១ នៅវិមានរដ្ឋសភា ឯកឧត្តម ឡេង ប៉េងឡុង អគ្គលេខាធិការរដ្ឋសភា និងជាប្រធានលេខាធិការដ្ឋានជាតិ ASEP11 បានមានប្រសាសន៍ថា បើទោះបីបញ្ហា ជំងឺកូវីដ១៩ នៅលើពិភពលោកនៅមិនទាន់បានធូរស្បើយនៅឡើយក្ដី ក៏សភាកម្ពុជានៅតែមានឆន្ទៈក្នុងការរៀបចំកិច្ចប្រជុំភាពជាដៃគូ សភាអាស៊ី-អឺរ៉ុប លើកទី១១ នៅក្នុងឆ្នាំ២០២១នេះដែរ។ ឯកឧត្តមអគ្គលេខាធិការរដ្ឋសភា បានបញ្ជាក់ថា យើងមានជម្រើសសម្រាប់ កិច្ចប្រជុំខាងលើនេះ ទោះបីមិនអាចជួបប្រជុំដោយផ្ទាល់ ក៏ត្រូវប្តូរមកធ្វើជាកិច្ចប្រជុំតាមប្រព័ន្ធវីដេអូ Conference វិញ។

ឯកឧត្តម ឡេង ប៉េងឡុង បានស្នើដល់គ្រប់ផ្នែកពាក់ព័ន្ធនឹងកិច្ចប្រជុំ ASEP11 ទាំងអស់ ត្រូវខិតខំបំពេញការងារទៅតាមផែនការដែល បានកំណត់ និងត្រូវពន្លឿនការងារឱ្យបានឆាប់។

សូមជម្រាបថា សភាកម្ពុជាបានទទួលធ្វើជាម្ចាស់ផ្ទះ រៀបចំកិច្ចប្រជុំភាពជាដៃគូសភាអាស៊ី-អឺរ៉ុប ដែលមានឈ្មោះជាភាសាអង់គ្លេសថា “Asia-Europe Parliamentary Partnership Meeting ហៅកាត់ (ASEP) លើកទី១១ នៅក្នុងឆ្នាំ២០២១នេះ។ ការទទួលធ្វើជាម្ចាស់ផ្ទះ កិច្ចប្រជុំ (ASEP) គឺជាផ្នែកមួយនៃកិច្ចប្រជុំកំពូលអាស៊ី-អឺរ៉ុប ហៅកាត់ថា ASEM ដែលរាជរដ្ឋាភិបាលកម្ពុជាក៏ទទួលធ្វើជាម្ចាស់ផ្ទះនៅ ក្នុងឆ្នាំ២០២១នេះដែរ ៕

អត្ថបទ និងរូបភាព ដោយនាយកដ្ឋានព័ត៌មាន