សម្តេចអគ្គមហាពញាចក្រី ហេង សំរិន ប្រធានរដ្ឋសភា បានលើកទឹកចិត្ត គំាទ្រ និងជួយឧបត្ថម្ភដល់ចំណុះទូកមួយចំនួន ដែលនឹង ចូលរួមនៅក្នុងព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក នាថ្ងៃទី១០-១១-១២ ខែវិច្ឆិកា ឆ្នាំ២០១៩ ខាងមុខនេះ។

មុនព្រះរាជពិធីបុណ្យមកដល់ ខុទ្ទកាល័យរបស់សម្តេចប្រធានរដ្ឋសភា ដែលមាន ឯកឧត្តម អៀក ខែម នាយករងខុទ្ទកាល័យសម្តេច អគ្គមហាពញាចក្រី ហេង សំរិន ដែលជាតំណាងរបស់ ឯកឧត្តម កែវ ពិសិដ្ឋ នាយកខុទ្ទកាល័យសម្តេចប្រធានរដ្ឋសភា បានជួប សំណេះសំណាលជាមួយគណៈកម្មការគ្រប់គ្រងទូក តំណាងកីឡាករអុំទូក និងបានផ្តល់ប្រាក់ឧបត្ថម្ភ គ្រឿងឧបភោគ និងសម្ភារៈ ប្រើប្រាស់មួយចំនួន។

ឯកឧត្តម អៀក ខែម បានពាំនាំការផ្តាំផ្ញើសាកសួរសុខទុក្ខរបស់សម្តេចប្រធានរដ្ឋសភា ជូនដល់កីឡាករអុំទូកទំាងអស់។ សម្តេចបាន ផ្តាំផ្ញើដល់កីឡាករទំាងអស់ ត្រូវសាមគ្គីគ្នា ចេះថែរក្សាសុខភាព និងរួមគ្នាថែរក្សាវប្បធម៌ប្រពៃណីជាតិ នៃព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ដ៏ល្អមួយនេះ ឱ្យដំណើរទៅដោយរលូន ដើម្បីបង្ហាញដល់ភ្ញៀវអន្តរជាតិបានឃើញ។

ទូកងដែលសម្តេចប្រធាន បានជួយឧបត្ថម្ភនាពេលនេះ មានទូកឈ្មោះ អគ្គមហាពញាចក្រីបារមីមុនីសាគរ។ ទូកឈ្មោះ អគ្គមហាពញា ចក្រីបារមីសំរិទ្ធស្រីសួគ៌។ ទូកឈ្មោះ ចេស្តាមហាចក្រីបារមីស្វាយសាច់ភ្នំ។ ទូកងនីមួយៗ ទទួលបានប្រាក់ឧបត្ថម្ភចំនួន១០លានរៀល។ ជាមួយគ្នានេះ សម្តេចក៏បានឧបត្ថម្ភដល់អ្នកអត្ថាធិប្បាយការផ្សាយផ្ទាល់ ទូរទស្សន៍ជាតិកម្ពុជា វិទ្យុជាតិ និងគណៈកម្មការប្រណាំងទូក ក្នុងរយៈពេលកម្មវិធីបីថ្ងៃនោះ ថវិកាចំនួន៥លានរៀល ផងដែរ៕

អត្ថបទ និងរូបភាព ដោយនាយកដ្ឋានព័ត៌មាន