ឯកឧត្តមបណ្ឌិតរដ្ឋ ជាម យៀប ប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្មនៃរដ្ឋសភា និងប្រធានអនុគណៈកម្មការហិរញ្ញវត្ថុ និងផ្គត់ផ្គង់ សម្រាប់ការរៀបចំកិច្ចប្រជុំប្រចាំឆ្នាំ នៃវេទិកាសភាអាស៊ី-ប៉ាស៊ីហ្វិក លើកទី២៧ ដែលសភាកម្ពុជាធ្វើជាម្ចាស់ផ្ទះ នាដើមឆ្នាំ២០១៩ ខាងមុខនេះ បានដឹកនាំកិច្ចប្រជុំត្រួតពិនិត្យលទ្ធផលការងារដែលបានអនុវត្តកន្លងមក។

កិច្ចប្រជុំនេះបានធ្វើឡើងនៅព្រឹកថ្ងៃទី១៤ ខែធ្នូ ឆ្នាំ២០១៨ នៅវិមានរដ្ឋសភា។ នៅក្នុងកិច្ចប្រជុំនោះ ឯកឧត្តមបណ្ឌិតរដ្ឋ ជាម យៀប បានជំរុញដល់ ក្រុមការងារទាំងអស់ ខិតខំបំពេញភារកិច្ចក្នុងការរៀបចំ និងផ្គត់ផ្គង់ ថវិកា សម្ភារៈ និងសេវាកម្ម ដល់ដំណើរការនៃកិច្ចប្រជុំលើកទី២៧ នៃវេទិកាសភា អាស៊ី-ប៉ាស៊ីហ្វិក ឱ្យទទួលបានជោគជ័យ។ ចំពោះគម្រោងចំណាយនានា ឯកឧត្តមប្រធានអនុគណៈកម្មការ បានណែនាំដល់ក្រុមការងារអោយពិនិត្យ វាយតម្លៃអោយបានល្អិតល្អន់ ពិសេសមានការសន្សំសំចៃខ្ពស់។

សភាកម្ពុជា បានទទួលធ្វើជាម្ចាស់ផ្ទះរៀបចំកិច្ចប្រជុំប្រចាំឆ្នាំ នៃវេទិកាសភាអាស៊ី-ប៉ាស៊ីហ្វិក លើកទី២៧ នៅខេត្តសៀមរាប ពីថ្ងៃទី១៤ ដល់ថ្ងៃទី១៧ ខែមករា ឆ្នាំ២០១៩។ វេទិកាសភាអាស៊ី-ប៉ាស៊ីហ្វិក ដែលហៅកាត់ថា APPF ជាវេទិកាប្រមូលផ្តុំសំឡេងតំណាងពលរដ្ឋធំមួយ ដែលមានសមាជិក ២៧ប្រទេស ៕